ÑE'ẼNGUE RAPE rire, Ysapy, Aranduka ha Pindo ojupi ysyry rupi Kuatiaretã gotyo, tenda kuatia ndaha'éihápe mba'e omombe'úva añónte: kuatia omohenda, omaña ha ipahápe oñemomba'e pe oĩvare. Upépe peteĩteĩ oguereko kuatia; téra ikatu hepy; ha ñe'ẽ peteĩ jepe ikatu oiko deuda ramo. Ohasa hag̃g̃ua umi okẽ, Ysapy oñomiva'erã pe heko tee: ha'e ohendukuaa umi ñe'ẽ oikovéva gueteri, ambue tapicha ohenduhápe kirirĩ año.Kuatiaretã niko tape morotĩ, tinta rape ha kuatiaresa ndojepytu'úiva táva. Ha katu pe orden porã guýpe oĩ ambue táva: umi ipo rupi oñe'ẽva; umi iñakãme ha ipy'apýpe oñongatúva purahéi ha ñe'ẽnga tekoha ndaiporivéimavagui; umi ndogueroviáiva téra, ayvu térã mandu'a ikatuha peteĩ institución mba'e.Upépe Ysapy ojuhu Kuatia'ípe, mitãkuña'i ikatúva ohendu téra tee, pe téra oñeñomíva téra oñemoĩva guýpe. Mokõive jejuhu omopu'ã porandu pyahu: mávapa hikuái, mamóguipa ou pe ikatupyry, ha mba'e ñemoñarepa itujave opa kuatiágui. Upe jave, Aranduka ojevyva'erã imitãkue rendápe, omaña rovái pe sistema ojapova'ekue chugui kuatia ra'y, ha ojuhu umi tapicha pe máquina ryepýpe jepe oñorairõva'ekue mitãnguéra ñe'ẽ ypykue ani hag̃g̃ua okañy araka'eve.Táva ruguaitépe, Ñe'ẽjára Guasu ohai gueteri. Hembipota ohupyty Ysapy, Mainumby mandu'a ha Kuatiañe'ẽ Ypykue ñemi. Pe oñepyrũva'ekue jeporeka ramo oñemoambue peteĩ ñorairõ guasúpe: mávapa oguereko derecho ombohéra hag̃g̃ua, mávapa oiporavo mba'épa imandu'arã, ha mba'épa oiko ñe'ẽ ndaha'evéiramo tembiporu año ha oikóramo chugui pu'aka.KUATIA RYE ombotuichave ÑE'Ẽ RENDY arapy peteĩ fantasía pytũ, simbólica ha guarani rekópe oñembohapóva rupive. Ha'e peteĩ mombe'upy jeguata, ñorairõ, mandu'a ha ñe'ẽ ñembohasa rehegua: kuatia ikatu ho'u tekove, kirirĩ ikatu oiko kañyha, ha peteĩ ñe'ẽ - ára ha hendápe oje'éva - ikatu oipe'a pe okẽ ojehecháva'ekue oñembotyva'erãha opa ára. Read more 
